LAOAG CITY – Boluntaryo a simmuko ti maitudtudo a mangidadaulo ti P2P Investment company nga agop-operar ditoy probinsya gapo kadagiti maaw-awat na a pangta iti biag.
Daytoy ti kinumpirmaran ni Agent Gerald Butale iti National Bureau of Investigation ditoy ciudad ti Laoag.
Nabigbig daytoy a ni Angelica Joyce Nacino, naasawaan ken residente iti ili ti Pasuquin, ngem nagpabigbig iti nagan a Katherine Joyce Ubaza.
Segun kenni Butale, adda dagiti empleado ni Nacino nga agallukoy ken agkolektar ti kwarta manipud kadagiti miembro ken maiturn-over amin iti maseknan.
Ummuna iti daytoy, umabot ti 47 a nabiktima ti nasao nga investment company ti napan nagreklamo iti NBI gapo ta saan dan a makaaw-awat ti anyaman a kantidad kas iti naikari kadakuada.
Kunana a basar iti palawag dagiti biktima, naenganyo dagitoy nga ag-invest iti nasao a kompanya gapo ta daytoy ket “double your money scheme” ken idi un-una ket makaw-awat da pay laeng.
Naamoan a manipud kadagiti nasao a bilang a napan nagreklamo ket umabot ti nasurok maysa a milyon a pisos ti nakolektar a kwarta.
Innayon ni Butale a ti kompanya ket saan a nakarehistro iti Security and Exchange Commission (SEC).
Iti agdama, adda iti kustudiyar ti NBI ni Nacino ken manamnama a mapilaan ti kaso a syndicated estafa apaman a makapag-imbestigar da a nalaing manaig iti daytoy.
