LAOAG CITY – Kinumpirmaran ni Dr. Joanne Corpuz, schools division superintendent iti Department of Education ditoy probinsya a kaaduan dagiti pabor nga aglukat ti klase iti anyaman nga aldaw ti bulan ti Agosto.
Daytoy ket pakaseknan ti School Year 2020-2021 a nailungalong a ti manamnama a panaglukat ti klase ket umuna a Lunes ti Hunyo agingga iti maudi nga aldaw ti Agosto.
Segun kenni Dr. Corpuz, babaen ti maiwaywayat a survey ket nakaawat da kadagiti inisyal report nga ado dagiti mangpabor a mangrugi ti klase iti anyaman nga aldaw ti bulan ti Agosto.
Gapu iti daytoy, inrakurak na ti nalawlawa a pannakaiwayat ti survey malaksid dagiti 700 a ribo a respondent seknan ti panangrugi ti School Year.
Kuna na a karaman pay ti pannakasurvey ti panagusar ti cellphone, telebisyon, radyo, online classes kas panagsurot ti social distancing, nga agserbi kas alternatibo tapno makaadal dagiti estudyante.
Inbatad ni Dr. Corpuz, nga iti kabiitan a panawen ket malpas ti survey ken agdepende ti rekomendasyon iti Inter-agency Task Force agraman ti pannakainaig na iti enhanced community quarantine.
Kabayatanna, basar kenni Corpuz, ti linaon ti statement ni Education Sec. Leonor Briones, ket awan pay ti pinal a desisyon mainaig ti panaglukat ti klase ngem ketdi naiget ti panagsagsagana ti ahensya ti learining continuity plan no maibilang maiyalud-od ti enhanced community quarantine.
Mamati ni Dr. Corpuz a saan a maapektaran ti kalidad ti edukasyon a maipaay kadagiti agad-adal babaen ti alternatibo a wagas ti pannakaipaay ti adal.
Innayon na nga adda met ti schedule iti alternative learning ngem agpapan iti dsaytoy a gundaway ket adda ti maiyus-uswat nga online traning dagiti mangisursuro.
Saanen a kasapulan nga agreport da iti inaldaw iti pagadalan no nakawork form home da.
