LAOAG CITY – Inpakaammo ni Dr. Liza Marie Paz-Tan, Dermatology and Diabetes Specialist and Medical Cosultant iti Mariano Marcos Memorial Hospital and Medical Center, nga agpada a pox virus ti tuko ken ti monkeypox ngem saan nga agpada iti kadadakkel nga agtaod iti bago ti tao.
Kuna na a ti monkeypox ket sakbay a maaddaan ti kastoy a sakit ket agbalin pay laeng a close contact iti immunan a naaddaan ti nasao a virus.
Segun kenni Dr. Tan, naideklara kas infection of concern ti monkeypox ngem saan a kas iti COVID-19 a nakarkaro nga amang ti epekto na.
Inbatad na a 30 agingga iti 40 a tawenen nga adda ti monkeypox nangruna iti Western Africa ngem babaen ti panagbyahe dagiti tattao, naaddaan ti sumagmamano a kaso iti katengaan ti tawen 2021.
In-inot nga immadu iti panagsinnukat ti tawen 2021 ken 2022 agingga a naan-anay nga immadu ti kaso na iti nagduduma a pagilian.
Maysa nga ehemplo ket iti umuna a kaso ti monkeypox ditoy pagilian a naduktalan idi naggapu iti sabali a pagilian.
Kuna ni Dr. Tan a dimmalan ti testing ti maseknan iti Singapore ken idi nagawid ditoy pagilian ket naipadalan manen iti testing ket dita a naduktalan manen a nagpositibo iti monkeypox rason a naipan iti isolation.
Inpakaammo na nga agtultuloy met ti pannakaobserbar kadagiti close contact ti maseknan a Pilipino a nagpositibo iti monkeypox.
Innayon ni Dr. Tan a babaen ti nasalun-at a bagi ken saan nga close contact iti tao nga addaan ti monkeypox agraman kadagiti ayup rason nga awan ti rumbeng a pagdanagan.
Idi met Hulyo 25, nairekord ti Singapore ti maika-siyam a kaso ti monkeypox a daytoy ket maysa a Pilipino a lalaki nga agtawen ti 31 kalpasan a nagpasar kadagiti sintomas idi Hulyo 21.
Nagpakonsultar ti maseknan iti Singapore General Hospital, naipadalan iti testing ken naadmit daytoy iti nasao met laeng a petsa a nagpasar ti sintomas.
Inpakaammo ti Ministry of Health a kasapulan ti 14 agingga iti 21 nga aldaw a panagrekobre ti maseknan manipud nagpositibo daytoy.
