LAOAG CITY – Nagbalin a kontrobersial ti pannakaipaay kadagiti major prizes ti Liga ng mga Barangay Night ditoy siudad ti Laoag kalpasan nga agpapada amin a Kapitan ti nangabak.
Segun ken ni Liga ng mga Barangay President Rbee Ablan, adda ti nadutokan a coordinator iti nasao a programa tapno maliklikan nga adda dagiti arungaing wenno panagririri.
Inbatadna a naisayangkat ti raffle draw babaen ti online no sadinno a dagiti sponsors kadagiti premio ket manipud kadagiti sumagmamano nga indibidual ken opisial ditoy probinsia.
Inlawlawagna nga awan ti nakaut nga aniaman a kantidad iti pundo iti Liga ng mga Barangay.
Kunana a dagiti kangrunaan met a nangabak iti raffle draw iti napalabas a tawen ket dagiti barangay secretary ken barangay treasurer.
Iti baet daytoy, inpasingked ni Ablan a balligi ti naisayangkat a programa a ti nagbalin a kangrunaan a sangaili ket ni Sec. Oscar Valenzuela, ti Chairperson ti Dangerous Drugs Board.
Innayonna a ti kangrunaan a gagem ti nasao a programa ket tapno mabigbig dagiti aramid ken sakripisio dagiti amin nga opisial ti barangay ditoy siudad ti Laoag.
Immuna iti daytoy, nakaawat ti reklamo ti Bombo Radyo Laoag mainaig iti maipagarup nga amin a nangabak ti online raffle draw iti Liga ng mga Barangay Night ditoy siudad ti Laoag ket agpapada a Kapitan no sadinno a 20 ti sag-1,000 pesos, 10 ti sag-2,000 pesos, 5 ti sag-5,000 pesos, 1 a 10,000 pesos ken 2 nga e-bike.
