LAOAG CITY – Inbatad ni Majority leader ken Ilocos Norte 1st district Rep. Sandro Marcos a saanna lapdan ti impeachment complaint kontra iti ama na a ni President Ferdinand Marcos Jr.
Inlawlawagna a ti kongreso ket “constitutionally bound” a denggen dagiti kaso ti siasinno man nga impeachable officials kas ti presidente ken dadduma pay.
Kunana a masapol nga aramiden na ti trabaho na kas majority leader ken responsibilidad ti kamara de representantes iti babaen ti konstitusyon a trataren ti aniaman nga impeachment complaint a maipila kontra iti siasinno man nga impeachable official ken awan ti karbengan na a manglapped iti aniaman a kaso a maipila wennu maipaima iti committee on justice.
Kabayatanna, inrakurak ti majority leader nga awan pulos ti panagdanag ti presidente iti naipila nga impeachment complaint kontra kenkuana gapu ta patienna nga awan ti inaramidna a madi, banag a patienna met daytoy a takder ti ama na.
Nupay kasta, kuna ni Congressman Sandro a saan da pay a naikkan ti gundaway tapno makapagsarita da iti ama na maipanggep iti impeachment complaint a naipila kontra iti presidente.
