LAOAG CITY – Inpasigurado ni Gov. Matthew Marcos Manotoc a makaumay pay laeng dagiti isolation facilities ditoy probinsya a pakaipanan dagiti kumpirmado a positibo iti coivd-19.
Segun kenni Manotoc, no bilang man mapno dagiti isolation facilities ti probinsya ket adda met dagiti naiyestablisar kadagiti nagduduma nga ili a pakaipanan dagiti maseknan.
Kunana a malaksid kadagiti municipyo ken ciudad ket adda pay dagiti barangay nga addaan ti bukod nga isolation facility a nakaikabilan dagiti nagpositibo ti covid-19.
Inbatad na nga iti agdama ket adda pay laeng ti umdas nga isolation facility a mabalin a maipausar kadagiti pasyente.
Ummuna iti daytoy ket adda ti panagdanag dagiti sumagmamano a kakailyan gapo iti agtultuloy a panagado ti bilang dagiti kumpirmado a kaso ti covid-19 ditoy probinsya.
Mainaig iti daytoy, nagpalagip ti gobernador a masapol ti panangsurot kadagiti health protocols tapno malpadan ti ad-ado a bilang ti kaso ti covid-19.
