LAOAG CITY – Ikonkonsiderar ti Makabayan Coalition a naipilan dan ti impeachment complaint da kontra ken ni Presidente Ferdinand Marcos Jr.
Daytoy ket iti baet a saan pay a naawat a mismo ni House of Representative Secretary General Cheloy Garafil gapu ta agdama nga adda idiay Taiwan tapno mapan umawat ti award.
Inlawlawag ti sumagmamano a complainants a da Bagong Alyansang Makabayan President Renato Reyes ken dati a Bayan Muna lawmakers Neri Colmenares ken Teddy Casiño a nailanad iti 1987 Constitution a masapol nga awaten ti secretary general dagiti reklamo.
Inpetteng ni Colmenares, a maysa nga abogado, a nasurot da dagiti requirement iti panagpila ti impeachment complaint gapu ta daytoy ket verified ken addaan ti endorsement.
Malaksid iti daytoy, inlawlawag pay ti abogado a saan a nadakamat iti konstitusyon ti sarita a secretary general no di ket ti laeng Kamara de representantes ti addaan ti mandato a masapol nga isumitir ti reklamo iti Secretary General, banag a sinurot da.
Segun met ken ni Casiño, nangibati da ti kopya ti impeachment complaint iti opisina ti Secretary General, nga isu ti mangi-transmit ken ni House Speaker Faustino Dy sa Lunes wenno no agsubli ti sesyon iti kababaan a pagpandayan linteg iti kongreso.
