LAOAG CITY – Inpakaammo ni Mr. John Paul Viernes ti Chief Education Supervisor School Operation and Governance School Division ti Department of Education – Laoag nga ikanselarda ti klase no agpukaw ti kuriente.
Segun kenkuana, saan laeng a tunggal bagyo wenno no makapasar ti nabara a panawen ditoy siudad ti Laoag ti ikonsiderardan no diket mairaman payen no adda ti power interruption wenno panagpukaw ti kuriente.
Inbatadna a no makapasar iti nasao a pasamak ket insigida a makikoordinarda kadagiti 40 a pagadalan tapno ammoen ti situasion dagitoy.
Inlawlawagna a no makitada a saanen a natalged para kadagiti estudiante ket ikanselarda nangruna kadagiti dakkel ti populasionna a pagadalan.
Kunana nga awan met ti generator dagiti pagadalan ken saan nga heat proof dagiti classroom.
Innayonna a babaen iti daytoy ket maliklikan ti aniaman a problema a mapasaran dagiti estudiante nangruna iti salun-atda.
