LAOAG CITY – Nauram ti makina ti maysa a backhoe nga iturturong ni Mr. Edward Ramos iti ili ti Solsona.
Iti palawag ni Ramos iti Bombo Radyo Laoag, kuna na a mapanna koma kitaen ti acete ti backhoe idi naduktalan na a nauram iti makina daytoy.
Patien na nga adda ti nangiranta a nanguram iti imanmando na a backhoe gapu ta adda ti nakita a saleng iti mismo a makina na.
Kuna na pay a mabalin a napasamak ti insidente iti rabii.
Nupay kasta, awan ti pamalpalatpatan ni Ramos no siasinno ti nangaramid iti daytoy aglalo ket awan ti karirriri na iti pagtrabahoan na.
Saan metten a nangipaay ti aniaman nga impormasyon ti Bureau of Fire Protection iti ili ti Solsona seknan iti nasao a pasamak.
