LAOAG CITY – Indeklarar ti official adjudicator ti Guinness a ni Sonia Ushirogochi a naburak ti Malabon ti Guinness World Record para iti kaatiddugan a linya ti mangkok ti noodles.
Naammoan a dagiti linya ti bowls ti noodles ket naikabil iti Malabon Sports Complex a tampok ti sikat a pancit Malabon manipud kadagiti nagduduma a culinary partners ti local government unit (LGU).
Iti official count, dumanon iti 6,500 a mangkok ti pancit ti naidatag ti Malabon a nangatngato ngem iti agarup uppat a ribu ti agdama nga akin-iggem ti rekord a Jinshi Beef and Rice Noodles Association ti China.
Agarup pasado alas-10:00 idi rinugianda nga idatag ti 12 a nalatak a panciterya idiay Malabon ti ipanpannakkelda a putahe ti pancit.
Adda ti distribution plan ti lokal a gobierno tapno ipaay ti tunggal bowl ti noodles gapu ta natalged met a kanen dagitoy.
