LAOAG CITY – Awan pay ti naawat ti Malacañang nga aniaman nga opisial a kiddaw manipud iti kampo ni dati a Presidente Rodrigo Duterte mainaig iti posibilidad a temporario a makaawid daytoy ditoy pagilian.
Daytoy ket kagiddan ti nagbalin a rakurak ti legal counsel ni Duterte a ni Atty. Nicholas Kaufman a kumpiansada a makaala ti dati a Presidente ti temporario a pannakawaya-waya sakbay ti naikeddeng a confirmation hearing inton Septiembre.
Inbatad ni Palace Press Officer Claire Castro, awan ti pangibasaran tapno talantanen ti administrasion ti isyu agingga nga awan ti pormal a panagkiddaw a naisubmitir iti Malacañang.
Innayon pay ni Castro nga aniaman a tignay maipanggep iti daytoy ket adalen laeng no adda ti naipasa nga opisial a request manipud iti kampo ni Duterte.
