LAOAG CITY – Ginutigot ti Malacañang iti publiko nga i-reportda ti aniaman a panagabuso wenno iregularidad iti panagpili kadagiti benepisiario ti Presidential Scholarship Program.
Kinuna ni Palace Press Officer ken Communications Undersecretary Claire Castro a dagiti reklamo mainaig iti programa ti scholarship ket mabalin nga i-report iti Liga ng mga Barangay national office, Department of the Interior and Local Government (DILG), Presidential Communications Office (PCO), wenno Office of the President (OP).
Nupay kasta, nagballaag ni Castro ti insigida a panangkita kontra kadagiti benepisiario, kunana a saan nga otomatiko a madiskualipika dagiti kakabagian dagiti opisial ti barangay nga umawat iti tulong ngem masapul a matungpalda dagiti rumbeng a kasapulan iti nasao a programa.
Innayonna nga adda mekanismo ti gobierno a mang-screen ken mangpili kadagiti kualipikado a benepisiario.
Iti babaen ti program’s criteria, masapul a ti benepisiario ket agturpos nga estudiante iti kolehio a dumani agsardeng gapu iti pinansial a parikut.
Kinuna ni Castro a dagiti scholars ket pinili dagiti opisyal ti barangay kageddan ti education committee ti Sangguniang Barangay. Ipatpatungpal ti Office of the President (OP) ti programa iti babaen ti pannakitinnulong ti Liga ng mga Barangay national office ken Department of the Interior and Local Government (DILG).
Impaganetget ni Castro a gagem ti Presidente a madanon ti scholarship program dagiti maikari nga estudyante iti nagduduma a paset ti pagilian, partikular kadagiti nauneg a komunidad a kayatda nga ileppas ti panagadalda ngem nakurkurang iti pinansial.
