LAOAG CITY – Impasigurado ni Malacañang nga adda umdas a kapasidad ti gobierno a mangbayad kadagiti utang ti pagilian, gapu ta kaaduan kadagitoy ket addaan iti napaut a panawen ti panagbayad.
Mainaig iti daytoy, agtultuloy nga isingsingasing ti administrasion ti reporma iti buis tapno mapapigsa ti kita ti gobierno ken nasaysayaat ti panang-monitor da iti utang ti publiko.
Segun kenni Presidential Communications Office Undersecretary ken Palace Press Officer Claire Castro iti press briefing ti Malacañang, ti Promoting Growth, Revenue, and Equity towards Socio-Economic Sustainability (ProGRESS) bill ket maysa laeng a paset ti nalawlawa a programa ti administrasion a reporma iti buis.
Kinuna ti Department of Budget and Management (DBM) a gagem ti ProGRESS Bill ti mangipaay iti dakkel a pannakabang-ar iti buis bayat a mapapigsa ti revenue capacity ti gobierno a mangsupusop kadagiti nasken a serbisio publiko ken napaut a programa para iti panagdur-as ti pagilian.
Impaganetget ni Castro nga umdas ti agdama a kita ti gobierno tapno matungpalna ti obligasionna iti utang iti umiso a tiempo.
Inlawlawagna pay a saan a kasapulan a mabayadan nga insigida ti dakkel a paset ti agdama nga utang gapu ta kaaduanna ket addaan iti napaut a panawen ti panagbayad, isu a mabalin nga in-inut a mabayadan ti prinsipal ken interes.
