LAOAG CITY – Inpetteng ti Malacañang nga awan ti kontradiksyon kadagiti rakurak ni Presidente Ferdinand Marcos Jr. ken ti dadduma pay nga opisyal ti goberno mainaig iti pannakaibalud iti Czech Republic ni dati nga Ako Bicol Party-List Rep. Elizaldy “Zaldy” Co.
Segun ken ni Palace Press Officer Usec. Claire Castro, nalawag ti nagbalin a palawag ti presidente ken ni Justice Secretary Fredderick Vida a ni Co ket adda iti kustodiyar dagiti otoridad iti Czech Republic gapu iti isyu ti immigration ken kinakurang ti umiso a dokumento.
Inpetteng na a ti sarita nga “arrest” ket saan nga inusar ti presidente no di ket ti aktwal a sitwasyon ket “apprehension due to immigration concerns.”
Inbatad pay ti Palasyo a ti Department of Justice ti nangibaga ti “restraint of liberty” ken ni Co gapu iti kinakurang ti dokumento, ngem daytoy ket mainaig laeng ti immigration procedures ken saan a pormal a panangarestar iti babaen ti criminal process.
