LAOAG CITY – Inpetteng ti Malakanyang a saan a diktador ni Presidente Ferdinand Marcos Jr. tapno diktaran ti agbalin a desisyon mainaig iti legislated wage hike.
Sungbat daytoy ti Palasyo iti rakurak ti sumagmamano a progresibo a grupo a no kayat ti presidente ket mabalin na nga ipatungpal ti pannakaipangato ti sweldo iti babaen laeng ti maysa a pammilin manipod iti Malacañang.
Nupay kasta, inlawlawag ni Palace Press Officer Claire Castro, saan a kontra ti presidente iti wage hike kangrunaan na ket pagsayaatan daytoy dagiti mangmangged.
Iti baet daytoy, inbatad nu Castro a masapol a suruten ti proseso, karaman ti panangtingiting ti Regional Tripartite Wages and Productivity Board iti sweldo iti kada rehiyon.
Innayon na a tinawen nga ad-adalen ti Regional Tripartite Wages and Productivity Board iti sitwasyon iti ekonomiya kadagiti lokalidad tapno makita no adda ti umdas a pagibasaran para iti pannakaipangato ti sweldo.
