LAOAG CITY – Naglikudan ti Malacañang ti akusasion dagiti sumagmamano a kongresista nga adda ti ammo ni Presidente Ferdinand Marcos, Jr. iti naawat a “kickback” dagiti sumagmamano a nangangato nga opisial manipud iti flood control projects.
Inbatad ni Palace Press Officer Usec. Claire Castro a naaramid met ti responsibilidad ti Kamara de Representantes nga imbestigaran ti pannakairaman ti Presidente iti flood control scandal no sadinno a dimmalan iti proseso ken naduktalan nga awan ti pangibasaran.
Inbatadna a nasken a saan a mausar nga armas ti aniaman a pammerperdi nga awan ti natibker a pangibasaran tapno laeng pakapsoten ti talek dagiti umili iti gobierno.
Saan met a sinungbatan ti Palasyo idi masaludsod no nasken nga agsarita dagiti opisial a maikonkonektar iti isyu.
Inlawlawagna a saanda pay a nakita ti akusasion ti maipagarup a text message iti nagbaetan da Presidente Marcos ken ni dati nga Usec. Adrian Bersamin a maipagarup a “bagman” ti Presidente.
Inpaganetget ti Malacañang ti kalikagum ti Presidente a tutukan pay laeng ti panagbangon ti ekonomia ti pagilian ken baybay-an ti ahensia nga imbestigaran ti aniaman nga impormasion mainaig iti flood control scandal.
