LAOAG CITY –Nagpannawagan ti Malacañang ti panagkaykaysa dagiti Pilipino iti panangidepensa iti nasional nga interes ken kinasoberano ti pagilian, kalpasan ti report nga adda dagiti politiko nga umaw-awat iti suporta manipud China.
Segun kenni Palace Press Officer Undersecretary Claire Castro, masapul a nalawag kadagiti Pilipino iti panangidepensada iti karrebengan ti pagilian iti West Philippine Sea ken dadduma pay a paset ti teritorio ti Pilipinas.
Impakdaar ni Castro a saan koma a mapalubosan dagiti ganggannaet nga interes a mangimpluensia iti liderato ken polisia ti pagilian.
Kinunana a narigat no ti maysa a lider a mangidadaulo iti Pilipinas ket kontrolen wenno impluensiaan ti sabali a pagilian gapu ta mabalin nga itandudona ti sabali nga interes ken naratibo imbes nga interes ti umili a Pilipino.
Impetteng ni Malacañang nga agtalinaed koma iti ima dagiti Pilipino ti pangngeddeng iti direksion ti pagilian.
