LAOAG CITY – Nagpalagip ti Malacañang nga adda ti pagsungbatan ti tunggal naelektaran nga opisial nga ipakaammo iti pagpapaayanda no isuda ket maawan iti trabaho a nabayag uray personal a bakasion ti rason.
Rakurak daytoy ti Palasyo kagiddan ti panagkiddaw ti travel clearance ni Davao City Cong. Paolo “Pulong” Duterte iti Kamara tapno agbiahe iti 17 a pagilian iti uneg ti sumurok dua a bulan.
Inpetteng ni Palace Press Officer Usec. Claire Castro, awan ti dakesna no agusar ti bukud a kuarta tapno agbakasion ti maysa nga opisial.
Nupay kasta, responsibilid ti opisial nga ilawlawag kadagiti umili no kasano a maitultuloy ti serbisio kabayatan nga addada iti adayo a lugar no atiddog ti kaawanda iti trabaho.
Innayon ti Palasyo, ti posision nga inpaay dagiti umili ket buyugan ti responsibilidad nga agserbi isut gapuna a nasken a nalawag iti publiko ti gagem ken epekto ti aniaman nga atiddog a biahe.
