LAOAG CITY – Saan pay a pinal ti panangipatungpal ti kontrobersial a Pax Silica Project.
Daytoy ti inpasigurado ti Malacañang kagiddan ti panawagan nga ipasardeng ti proyekto gapu iti panagamak iti suplay ti danum, kuryente ken maipagarup a kinakurang ti konsultasion kadagiti maapektaran a komunidad.
Inbatad ni Palace Press Officer Undersecretary Claire Castro nga agtultuloy ti panangtingiting ti gobierno ti amin nga isyu maipanggep iti proyekto pakairamanan ti panagbalin nga epekto daytoy iti danum ken kuryente.
Gapu iti daytoy, kunana a mabalin pay a balbaliwan ti sumagmamano a probision ti proyekto no daytoy ti mangpasayaat kadagiti Pilipino ken kadagiti pagilian a kabinnulig ti Pilipinas.
Kabayatanna, nagkedked nga agkomento ni Castro iti kinaawan ti ideya ni Vice President Sara Duterte mainaig iti Pax Silica.
Maipalagip nga iti maysa nga interview idiay The Hague, nasaludsod ni Duterte no ania ti opinyon daytoy iti proyekto ngem saan daytoy a nakaipaay ti aniaman a sungbat.
