LAOAG CITY – Saan a makibiang ti Malacañang iti reklamo ti Office of the Ombudsman a maipagarup a marigrigatanda a mangala ti kopya ti Statement of Assets, Liabilities and Net Worth wenno SALN dagiti kontratista a kongresista a karaman iti maanomalya a flood control projects.
Inbatad ni Palace Press Officer ken Presidential Communications Office Usec. Atty. Claire Castro nga adda ti kabukbukudan a pagannurotan tunggal ahensia ti gobierno.
Inlawlawawagna nga adda ti separation of powers iti nagbaetan ti ehekutibo, lehislatura ken hudikatura isu nga iresrespetar ni Presidente Ferdinand Marcos Jr. no ania ti pagalagadan ti Kongreso maipanggep iti Statement of Assets, Liabilities and Net Worth.
Kunana a likliklikan ti Presidente ti maaw-awagan nga executive overreach wenno ti panaglabsing ti bileg ti ehekutibo iti sabali nga ahensia ti gobierno a maikanniwas iti Konstitusion.
Nupay kasta, inlawlawag ti Malacañang a nalawag ti takder ni Presidente Marcos a nasken nga agsungbat dagiti adda iti likudan kadagiti maanomalya a proyekto ti gobierno.
Immunan nga inreklamo ni Ombudsman Jesus Crispin Remulla a maipagarup nga agkedkedked ti House Secretary General a mangipaay ti kopya ti Statement of Assets, Liabilities and Net Worth dagiti kontratista a kongresista gapu ta kasapulan pay laeng daytoy nga aprobaran ti plenario ti Kamara.
