LAOAG CITY – Saanen a nagkomento ti Malacañang kadagiti baro a kaso a naipila kontra ken ni Vice President Sara Duterte iti Office of the Ombudsman.
Inbatad ni Palace Press Officer Undersecretary Claire Castro, saan daytoy a mapagsasaritaan iti Palasyo.
Nupay kasta, sibubukel ti panagtalek ni Presidente Ferdinand Marcos Jr. iti kabaelan ti Ombudsman nga aramiden ti responsibilidad daytoy.
Inpetteng ni Castro nga inpaganetget ti Presidente iti panangbiruk ti kinapudno ken no adda ti ebidensia kontra iti asinoman a maak-akusaran iti maanomalya ket nasken daytoy nga imbestigaran.
Maipalagip a nangipila ti kaso a plunder, malversation ken graft ni dati a Senador Antonio Trillanes IV ken ti civil society group a The Silent Majority kontra ken ni Vice President Duterte.
Basar iti reklamo, ti kaso ket adda ti pakainaiganna iti maipagarup a biddot a panagusar ti binilyon a pisos a confidential funds ken dadduma pay a pundo ti gobierno.
