LAOAG CITY – Kinumpirmaran ni Mrs. Perlita Cabello, ti mangidadaulo ti CSWDO ditoy ciudad ti Laoag nga adda ti maladaga a naibati iti sango iti maysa a pagtaengan iti Barangay 1 ditoy ciudad.
Basar iti impormasyon, itay parbangon ket mapan kuma iti comfort room ti maysa kadagiti miembro ti pamilya idi nakangeg ti agsangsangit a maladaga.
Gapo iti amak na ket intawag na a dagus iti kabsat na ken nakita da a mismo ti lalaki a maladaga iti arwangan ti pagtaengan da.
Dagus da met nga intawag iti Dept. of Public Safety ken iti panagresponde dagitoy ket nagsursur da tapno maamoan no adda ti nakitkita nga indibidual a naggapo iti nasao a lugar.
Naamoan nga idi nakita ti nasao a pamilya ti maladaga ket silalamo-lamo, saan pay a nadalusan no sadinno ket adda pay laeng tu umbilical cord wenno puseg na.
Mainaig iti daytoy, kuna ni Cabello nga iti agdama ket adda iti ospital ti nasao a maladaga ken manamnama a dumalan iti swab test intono bigat pakairamanan ti pulis a nagresponde.
Adda met ti CCTV a naimuntar iti nasao a lugar ngem saan a nalawag ti footage.
Iti agdama ket agtultuloy pay laeng ti naun-uneg nga imbestigasyon tapno maamoan no siasinno ti nangibati iti maladaga iti sangwanan ti maysa a pagtaengan iti nasao a barangay.
