LAOAG CITY – Natay dagiti agina kalpasan a nadungpar ida ti maysa nga SUV Montero Sport idiay Barangay Caruan, Pasuquin, Ilocos Norte.
Nabigbig dagiti biktima a da Mary Anne Resurrecion, ken ti anak na a 10 a bolan na pay laeng a maladaga a babae, residente met laeng dagitoy iti nasao a barangay.
Segun ti driver ti SUV a ni Riky de Leon, agtawen iti 36, maysa a seaman, taga Pampanga ngem immay da laeng nagbakasyon ditoy ciudad ti Laoag, bayat nga agpapa-amyanan da a direksyon ket adda ti liniklikan na a poste ti kuryente.
Gapu ti daytoy, napukawan ni de Leon ti kontrol iti manibela a possible a nangitunda ti panagpuligos ti lugan a nakadungparan na dagiti lako nga asin iti igid ti kalsada, karaman ti maysa a kubo-kubo ken dagiti agina a biktima a magmagna laeng iti lugar.
Kinumpirmaran ni de Leon a kadwa na ti asawa ken dua nga annak da ngem nagyaman gapu ta saan a nakaro ti nagpasaran dagitoy.
Kabayatanna, inbatad ti saanen a nagpabigbig a kabsat ti biktima a mapan koman agdigus dagiti agina tapno mapan da iyenrol ti maysa nga anak ni Mrs. Resurrecion idi napasamak ti insidente.
Iti agdama, agtultuloy pay laeng ti imbestigasyon dagiti otoridad iti napasamak nga insidente.
