LAOAG CITY – Natay ti agtawen ti tallo a bulan pay laeng a maladaga idiay Gamay, Northern Samar kalpasan a nakaptan ti pertussis wenno ti whooping cough kas maibasar iti Department of Health (DOH).
Segun ken ni Ms. Jelyn Malibago, Department of Health Information Officer idiay Eastern Visayas, ti maladaga a natay idi Abril 11 ket isu ti kaunaan a naimaldit a pertussis fatality iti nasao a rehion.
Kunana a ti maladaga ket nakaawat ti shots kontra iti pertussis nga immuna a naitaray iti Gamay District Hospital ken saan a nagbayag ket naiyakar iti Northern Samar Provincial Hospital nga isu ti nakatayanna.
Ti pertussis ket maysa nga highly infectious bacterial disease. Karaman kadagiti sintomas daytoy ket ti runny nose, nasal congestion, red ken watery eyes, gurigor, uyek ken extreme fatigue.
Adda ti 48 suspected pertussis cases iti rehion manipod idi Enero agingga Abril 18.
Naammoan a dagiti nasao a bilang, pito ditoy ti nagpositibo iti sakit a rimuar iti test results nga inparuk-at ti Research Institute for Tropical Medicine.
Kabayatanna, dumanon iti 35 kadagiti biktima ket ubing nga agtawen ti maysa agpababa bayat a 33 ditoy ti saan a nakaawat ti bakuna kontra iti pertussis.
