LAOAG CITY – Bwineltaan manen ti Malakanyang ti sabali a pammasagid ni Vice President Sara Duterte.
Daytoy ket mainaig iti nairakurak ni Vice Duterte a maipagarop a nabayag nga agaramid ti addang ni Presidente Ferdinand Marcos Jr. kontra iti maanomalya a flood control projects.
Pinalagipan ni Palace Press Officer USec. Claire Castro ni VP Sara a ni Presidente Marcos ti mismo nangidaulo iti pannakaimbestigar dagiti maanomalya a proyekto isut gapuna a makalkal aminen dagitoy.
Inpetteng na a saan a kas iti naglabas nga administrasyon Duterte nga awan ti inaramid na a kastoy a klase ti imbestigasyon iti baet dagiti insidente ti panagkunniber.
Inyarig ni Castro ti ibilang na a binaybay-an laeng ti panagampayag ti pagayam ti dati nga administrasyon Duterte iti isyu ti korapsyon iti overpriced a facemasks ken medical equipment a nakairamanan ti pharmally.
Segun pay ken ni Castro, nabayag met a nagbalin a sekretaryo ti Department of Eduction ni Vice President Duterte ngem ti inbati na ket maipagarop a ghost students para kadagiti voucher, nakatiwangwang laeng a gadgets ken dadduma pay.
Kuna pay ni Castro a nalawag no siasinno ti agsarsarita laeng nga awan ti maar-aramidan na ken no siassino ti masansan nga agbiyahe nga awan ti mairepreport na a benepisyo manipod kadagiti personal a biyahe na.
Inkalintegan pay ni Castro nga iti babaen ti Marcos administration ket addaan ti due process saan a kas iti dati nga administrasyon Duterte nga awan ti due process, no di ket matay a dagus dagiti indibidwal a karaman iti aniaman nga isyu.
