LAOAG CITY – Inbasura ti Malakanyang ti ibilang na a “wild imagination” ni Vice-President Sara Duterte a plano ti administrasyon ni Presidente Ferdinand Marcos Jr. nga ipabalod karaman dagiti kaalyado na sakbay ti 2028 presidential race.
Inpetteng ni Presidential Communications Office Undersecretary ken Palace Press Officer Claire Castro nga awan ti rumbeng a pagdanagan ti bise presidente ken dagiti political allies na, karaman ditoy ni Senador Imee Marcos gapu ta awan ti kastoy a plano ti agdama nga administrasyon.
Immunan nga inpetteng ni Presidential Sister Imee Marcos a maipagarop nga ipilpilit ti administrasyon Marcos nga ipatugaw ni Department of Justice Secretary Boying Remulla kas Ombudsman tapno maipabalud ni Vice President Dutete ken dagiti kaalyado na.
Inpetteng ni Senadora Marcos nga adda pay ti dua a kaso a nakapenpen kontra ken ni Remulla iti Ombudsman, daytoy ket ti administrative ken criminal cases, ngem maipagarop a maipilpilit a maibasura tapno maikkan ti gundaway para iti appointment na.
Innayon ti senadora a saan a rumbeng a politiko ti madutukan iti Ombudsman gapu ta adda ti conflict of interest malaksid pay ti kaadda ti dua a nakapenpen a dua a kaso ti maseknan.
