LAOAG CITY – Inabisoan ti Malakanyang dagiti nagannak a saanda nga ipalpalubos a kanayon a nakatutok iti gadgets dagiti annakda.
Inbatad ni Palace Press Officer Atty. Claire Castro a mangiyalokar ti oras kas ti story time tapno maaddaan ti quality time para kadagiti annakda.
Kunana a sabalin ti panawen ita no sadinno nga ad-adu ti oras dagiti ubbing iti panagusar ti gadgets nga imbes ket maaddaan ti quality time kadagiti nagannak kadakuada.
Inlawlawagna a no nagaget laeng dagiti nagannak a mangisuro kadagiti annakda ket made-develop ti panagpanunot dagiti ubbing para iti nalawlawa a perspektibo.
Innayonna a saan a mabalin a dagiti makitkita wenno mabuybuya iti social media ti mapidot nga adal dagiti ubbing gapu ta napigsa nga impluwensia ti social media isu a napateg a maaddaan ti panawen dagiti nagannak tapno suroan dagitoy.
