LAOAG CITY – Bwineltaan ti Palasyo ti Malakanyang ti nagbalin a banat ni dati a Presidente Rodrigo Duterte kontra ken ni Presidente Ferdinand Marcos Jr. a maipagarop nga agplanplano a mangisubli ti diktadura iti pagilian.
Iti maysa nga statement, inbatad ni Executive Secretary Lucas Bersamin nga ibilang da ti nasao a rakurak nga awan ti pagibasaran na ken nakakat-katawa.
Inpetteng ni Bersamin a ti nasao a rakurak ti dati a presidente ket arigna atiddog nga istorya manipod iti maysa a tao nga alisto nga agswitik ken agimbento kadagiti makaallilaw a sarita.
Segun iti Malakanyang, ti kastoy a pananglukluko ket maysa a budol nga agtaod manipod iti maysa a pabrika ti peke a damag.
Inpasigurado ni Bersamin a ti administrasyon Marcos ket kanayun na nga ipakpakita dagiti ar-aramiden na a maiyataday iti naipalaon iti Konstitusyon, panangsurot ti linteg ken panangrespetar iti karbengan dagiti tattao.
