LAOAG CITY – Inpasigurado ti Malakanyang ti alisto a tulong para kadagiti naapektaran ti 6.9 magnitude a gingined idiay Cebu.
Inbatad ni Presidential Communications Office (PCO) Secretary Dave Gomez nga adda ti standby calamity fund ti Department of Budget of Management (DBM) manipud iti National Disaster Risk Reduction Fund.
Kunana a manarimaan ti damage assessment kadagiti lugar a tinamaan ti napigsa a gingined.
Saan met a masinunuo ni Gomez no mano ti gatad ti pundo nga iruar ti Department of Budget of Management.
Nupay kasta, basar iti Department of Budget of Management, adda pay ti P8 bilyon nga standby fund para iti quick response effort ti gobierno.
Inlawlawag ti sekretario nga ipaspasigurado ni Presidente Ferdinand Marcos Jr., a maipaay ti alisto a tulong kadagiti residente idiay Cebu.
Iti agdama, amin a resources ti gobierno ket inpa-mobilize metten ti Presidente.
Inpasingked ni Sec. Gomez a whole-of-government approach ti sistema nga ipatpatungpal ti gobierno idiay Cebu.
Naiget a bantayan ti gobierno dagiti managgundaway no sadinno a nangipatungpalen ti Department of Trade and Industry ti price freeze kadagiti kangrunaan a taraon ken gasoline idinto nga iti Department of Energy ket ar-aramidenda ti amin tapno maisubli ti kuryente iti lugar.
Naka-deploy metten ti Philippine National Police tapno masigurado ti peace and order ken maliklikan ti looting.
Naammoan nga inton bigat ket naikeddeng a bumisita iti ground zero ni Presidente Marcos.
