LAOAG CITY – Nagpanawagan ti Malakanyang kadagiti Pilipino a respetaren ti nagbalin a desisyon ti Korte Suprema mainaig iti panangideklarar na a ti Articles of Impeachment kontra ken ni Vice President Sara Duterte ket unconstitutional.
Inbatad ni Palace Press Officer Undersecretary Atty. Claire Castro a saan da pay a naan-anay a narebisar ti pakabuklan iti nagbalin a desisyon ti Korte Suprema ngem masapol a respetaren daytoy ti amin a Pilipino ken agtalek iti institusyon.
Innayon na a ti impeachment process ket tinaming ti legislative ken judicial branches, ken bigbigen da ti panagwaywayas dagitoy a nangipatungpal kadagiti mandato da iti konstitusyon.
Immuna iti daytoy, sangsangkamaysa a nagdesisyon ti Korte Suprema a ti Articles of Impeachment ket maipawil iti maysa a tawen a pagannurutan iti babaen ti Article XI Section 3 paragraph 5 ti Konstitusyon.
Malaksid iti daytoy, inpaganetget pay dagiti mahistrado a dagiti artikulo ket linabsing na ti kalintegan iti umiso a proseso.
Mainaig iti daytoy, nag-inhibit ni Associate Justice Alfredo Benjamin Caguioa idinto a ni Associate Justice Maria Filomena Singh ket nakabakasyon, no sadinno a ti desisyon ket pinirmaan ni Senior Associate Justice Marvic Leonen.
Kabayatanna, kuna ni Supreme Court spokesperson Atty. Camille Ting a ti desisyon ti kangatoan a korte ket dagus a maipatungpal ngem mabalin ti agpila ti motion for reconsideration ti kamara de representantes.
Innayon na a no adda ti maipila manen nga impeachment complaint kontra ken ni Vice President Duterte ket maaramid to laengen intono Pebrero 6, 2026.
