LAOAG CITY – Nagpanawagan ti Malakanyang iti public transport sector, kangrunaan na dagiti drivers, nga agtalek da iti ar-aramiden nga addang ti gobierno kabayatan ti agtultuloy a panagngati ti presyo dagiti produkto a petrolyo.
Inaramid daytoy ni Palace Press Officer Undersecretary Claire Castro kabayatan ti agtultuloy a panagpanawagan dagiti drivers ken operators a solusyonan ni President Ferdinand “Bongbong” Marcos Jr. ti nasao a problema.
Inpetteng ni Castro nga iti agdama, ti kasapulan ket ti panagkaykaysa ken panagtitinnulong.
Kuna na nga ammo ni Presidente Marcos Jr. ti arungaing ti amin gapu iti epekto ti riribok iti Middle East.
Innayon ni Castro nga awan ti mangayat iti agdama a sitwasyon ken saan a basol ni Presidente Marcos Jr. ken ti gobierno.
Inpalagip pay ni Castro a saan a linged iti amin a ti inyuna nga inpaayan ni Presidente Marcos ti ayuda ket iti transportation sector.
Inpaganetget ni Castro a ti laeng dawdawaten da ti pannakaawat ken panagtalek ti publiko kadagiti desisyon ti gobierno a balbalansien na ti panangtulong kadagiti commuters ken iti amin a transportation sector.
