LAOAG CITY – Nagtalinaed ti takder ti Malakanyang a saan a bigbigen ti gobierno ti Pilipinas ti hurisdiksyon ti International Criminal Court (ICC) iti pagilian.
Daytoy ti inbatad ni Presidential Communications Office Undersecretary ken Palace Press Officer Claire Castro.
Immuna iti daytoy, inbatad ni International Criminal Court Spokesman Fadi El Abdallah a kasapulan nga awaten ti Pilipinas dagiti teknikal a kondisyon tapno ikonsiderar dagiti korte ti kiddaw para iti interim release ni dati a Presidente Rodrigo Roa Duterte.
Kuna na a kaspaulan a makipagtulag ti maysa nga estado kadagiti naituding a kondisyon sakbay nga aprubaran ti temporaryo a pannakawaya-waya ti dati a presidente.
Nupay awan pay ti pormal nga aplikasyon, inbatad ti lead counsel ti dati a presidente a ni Nicholas Kaufman nga agpila da ti petisyon iti umiso a panawen.
Malaksid iti daytoy, kuna pay ni Castro a mabalin a malukatan ti dadduma nga isyu no pilyen ti Pilipinas ti makitinnulong iti International Criminal Court mainaig iti nasao nga isyu.
Kabayatanna, inrakurak ni International Criminal Court Spokesman Fadi El Abdallah a nakadepende iti desisyon ti gobyerno ti Pilipinas ti aniaman a posibilidad ti temporaryo a pannakawaya-waya ken panagsubli ni dati Presidente Duterte manipod iti International Criminal Court (ICC) iti The Hague.
Maipalagip a naikabil ni Duterte iti International Criminal Court Pre-Trial Chamber I idi Marso 14 tapno pormal a denggen dagiti akusasyon kontra kenkuana.
Naka-schedule met ti confirmation of charges hearing intono Setyembre 23 ita a tawen ngem namnamaen a mangisumitir ti kiddaw para iti interim release sakbay iti nasao a petsa.
