LAOAG CITY – Sinuspenso ti Palasyo ti Malakanyang ti serrek iti gobyerno ken uray ti klase iti amin a lebel intono bigat, November 10, 2025 gapu iti Supertyphoon Uwan.
Inpasuk-at ti Malakanyang ti Memorandum Circular No. 106 a mangsuspenso iti klase iti amin a lebel ken ti trabaho iti gobyerno gapu iti epekto ti super typhoon Uwan.
Ti suspension ket basar iti nagbalin a rekumendasyon ti National Disaster Risk Reduction Management Council (NDRRMC).
Basar iti memorandum circular a pinirmaan ni Executive Secretary Lucas Bersamin, karaman kadagiti awan ti serrek na intono bigat ket ti National Capital Region, Cordillera Administrative Region, Regions 1,2,3, 4-A,4-B, 5, ken region 7.
Suspendido met ti klase iti amin a lebel ti region 6 ken Negros Island region, intono bigat, Nov. 10 agingga iti Nov. 11,2025.
Inpetteng ti Malakanyang nga agtultuloy ti trabaho dagiti government offices a responsable iti panangipaay kadagiti basic services.
Inlawlawag ti Palasyo a mabalin met ti agdeklarar ti suspension of work and classes dagiti local chief executives kadagiti bukod da a lugar idinto a ti suspension of work kadagiti private companies ket adda iti discretion dagiti mangidadaulo.
