LAOAG CITY – Kinumpirmaran ti Department of Justice (DOJ) a saan a makitintinnulong ti gobierno ti Malaysia iti maiwaywayat nga imbestigasion ti Pilipinas mainaig iti panaglibas iti pagilian ni dismissed Bamban, Tarlac Mayor Alice Guo.
Inbatad ni Department of Justice Secretary Jesus Crispin Remulla a mabalin a saan a kayat a pagsaritaan ti Malaysia ti nabayagen a territorial dispute iti dua a pagilian maipanggep iti Sabah.
Naammoan nga uray ania ti salsaludsuden ti Department of Justice ket saan a mangipapaay ti detalye ti Malaysian government no kasano a nakadanon kadakuada ni Guo.
Malaksid iti daytoy, karaman pay ti flight records ken detalye ti eroplano a nagluganan ni Guo tapno aglibas ken makadanon idiay Malaysia ket saan a mangted ti impormasion ti gobierno ti Malaysia.
Maipalagip a nangiwayat ti imbestigasion ti Senado mainaig iti panaglibas ni Guo iti pagilian no sadinno nga inadmitir ti Bureau of Immigration a nagusar ti backdoor ti dati a Mayor iti babaen ti panagna iti Tawi-Tawi a nagturong iti Sabah.
Immuna iti daytoy, ni Guo wenno ad-adda nga am-ammo kas Guo Hua Ping ket naarestar idiay Indonesia idi Septiembre iti napalabas a tawen kalpasan a sumangsango kadagiti sumagmamano a kaso gapu iti operasion daytoy iti iligal a Philippine Offshore Gaming Operators operations.
