LAOAG CITY – Bimmaba ti “prevalence rate” ti malnutrition ditoy Ilocos Norte ita a tawen no maidasig itay napalabas a tawen 2021.
Segun ken ni Provincial Nutritionist Mrs. Elma Irapta, iti undernourished manipud iti 3.21 ket nagbalin a 2.8 ita a tawen.
Inlawlawagna a basar iti data, ti stunting ti probinsia ket bimmaba manipud iti 6.7 ket nagbalin a 4.7; wasting-manipud iti 1.7 ket nagbalin a 1.5; overweight ken obese, bimmaba manipud iti 3.65 ket nagbalin a 2.96.
Inbatadna nga ipamatmat daytoy a dandani amin nga “indicator” ket bimmaba.
Inlawlawagna a napintas daytoy a damag para iti probinsia ken maysa kadagiti kangrunaan a naragsakan ket ni Gob. Matthew Marcos Manotoc gapu ta kaipapanan daytoy a sumaysayaaten ti “nutritional status” dagiti ubbing manipud maladaga agingga iti agtawen ti lima.
Inbagana a kangrunaaan a dakkel ti naaramidanna iti daytoy a banag ti “feeding program” ni Gob. Marcos Manotoc.
Innayonna a ti nasao a programa ket adda ti para kadagiti maladaga manipud ti tallo agingga iti lima a bulan, adda met ti para kadagiti innem a bulan agingga iti agtawen ti dua ken adda pay ti para kadagiti masikog.
