LAOAG CITY – Inlawlawag ni Ms. Hazel Jane M. Orge, ti Malusog Rice Area Project Coordinator iti Department of Agriculture- Philippine Rice Research Institute iti ciudad ti Batac a ti “malusog rice” ket dimmalan ti naiget a biosafety assessment babaen kadagiti tallo nga ahensya ti gobierno ditoy pagilyan.
Kuna ni Orge a karaman kadagiti nangiyuswat ti biosafety assessment iti “malusog rice” ket ti International Rice Research Institute, Philippine Rice Research Institute ken Bangladesh Rice Research Institute.
Inbatad na a ti “malusog rice” ket produkto ti Genetic Engineering ken nangrugi paylaeng ti panagsukisok da idi katengngaan ti 1990’s.
Segun ken ni Orge, nabayag ti pannakaadal daytoy a proyekto tapno masigurado a pumasa iti amin a biosafety standars ken dimmalan iti amin a regulatory assessments ti nagduduma a pagilyan, karaman ditoyen ti Pilipinas.
Innayon na a ti “malusog rice” ket maysa a variety ken pimmasan iti sertipikasyon ti National Seed Industry Council idi 2021.
Immunan nga indeklarar ti Department of Agriculture –Bureau of Plant Industry a kas ti ordinaryo a bagas ket natalged a kanen daytoy.
Ti Malusog Rice (Golden Rice) ket addaan ti umuna a rehistrado a variety iti Pilipinas kas Malusog 1.
Mainaig iti daytoy, inpakaammo ni Miss Gladys May G. Cristobal, iti Malusog Rice Program Stakeholder Engagement Office iti Department of Agriculture- Philippine Rice Research Institute a ti “malusog rice” ket addaan ti beta-carotene a maiconvert iti Vitamin A.
Inpanakkel ni Cristobal a ti laeng Pilipinas ti addaan ti “malusog rice” iti intero a lubong.
