LAOAG CITY – Inbatad ni Mayor Albert Chua iti siudad ti Batac a kalikagum ni Presidente Ferdinand Bongbong Marcos Jr. maisubli a maminpinsan ti face to face classes kadagiti amin a pagadalan ditoy pagilian agingga intuno Nobiembre.
Kuna a daytoy ti inpakaammo ti presidente kabayatan ti virtual a pannapakipagpaset na iti taripnong idiay Malacañang agraman dagiti League of Governors and Mayors kenni bise presidente Sara Duterte nga isu ti secretary ti DepEd.
Segun ken ni Chua, naidasar pay iti taripnong dagiti addang a masurot sakbay ti maminpinsan a pannakaiyimplimentar ti lima nga aldaw a face to face classes.
Kuna na a sakbay ti target a bulan ti Nobiembre ket plano ti tallo nga aldaw a sumrek iti pagadalan dagiti estudyante ken dua nga aldaw ti online.
Inbatad na a kalpasan ti maysa a bulan ket maipan iti uppat nga aldaw ti panagserrek iti pagadalan ken maysa aldaw ti online class.
Mainaig iti daytoy, inpakaammo ni Chua a kageddan ti manamnama a panagluka ti klase ket masapol ti nasyaat a bentilasyon kadagiti classroom.
Kuna na nga iti biang met ti DOH ket nagpalagip a matutokan ti pangbakuna kangrunaan ti booster kadagiti agad-addal.
Immunan nga inpakaammo ni Chua a basar iti naiparuk-at nga academic calendar, ti Agosto 22, 2022 agingga iti Hunyo 1, 2023 ti naituding nga a klase dagiti adda iti pampubliko a pagadalan.
Kuna na nga a kadagiti met pribado a pagadalan ket adda ti pawayway na nga aglukay intuno Agosto 31 ken agpatingga ti school year iti saan a naladladaw ngem Hunyo 31.
Naamoan a saan a personal a nakaatendar ni Presidente Marcos iti taripnong idiay Malakanyang kalpasan a nagpositibo iti covid-19.
