LAOAG CITY – Inbatad ni Sanggunian Panlungsod Member Edison Bonoan ken chairman ti committee on transportation ditoy siudad a maadal ti maminpinsan a pannakaisubli ti implementasyon iti No Left Turn Policy iti Nangalisan Junction road ditoy siudad.
Kuna ni Bonoan nga iti agdama ket dagiti pay laeng aggapo iti Manila North road ti maipawil nga agleft-turn wenno agturong iti aiport road.
Nu pay kasta, kuna ni Bonoan a plano na ti makisarita ken ni PNP traffic division chief PMSgt. Ferdinand Santos, tapno mapagsaritaan no rumbeng a maminpinsanen a maiyimplimentar ti no left turn policy iti nasao a lugar.
Inbatad na a kageddan daytoy ti in-inot a panaglukay dagiti pagaladagan kontra iti covid-19 ken ti pannakaipan ti probinsya iti babaen ti Alert Level 2 nu sadino a naway-waya a makaruar dagiti ado a behikulo.
Mangnamnama ni Bonoan a nu bilang maisubli ti nasao a pagalagadan ket maawatan ti publiko gapu ta nakaiyataday daytoy iti baro a traffic ordinance ditoy siudad.
Immunan nga adda dagiti obserbasyon a nairot ti trapiko iti paset ti nangalisan junction road nangruna iti aldaw.
