LAOAG CITY – Napilaanen ti reklamo a panaglabsing iti Republic Act 9165 wenno Comprehensive Dangerous Drugs Act of 2002 ti maysa a waiter a maibilang kas High Value Individual kalpasan a naalaan ti agdagsen ti 10 a gramo ti maipagarop nga illegal a droga iti ili ti Paoay.
Daytoy ti inbatad ni Police Capt. Jackson Sugayen, ti chief of police iti ili ti Paoay.
Segun ken ni Sugayen, nakaawat da ti report nga adda ti mapan ideliver ti suspek nga agtawen ti 30 a lalaki ken waiter iti maysa a Restaurant iti ili ti Paoay isut gapu na a nangiyuswat da a dagus ti operasyon.
Kuna na a nakumpiskar dagiti otoridad ti agbalor ti 68 ribo a pisos a maipagarop a shabu.
Inpakaammo ni Sugayen a naduktalan da a ti mismo a manager ken agtagikua iti nasao a restaurant ti pangideliberan ti waiter kadagiti illegal a droga.
Nupay kasta, kuna ni Sugayen a nagtalapwagaw a dagus ti agtagikua iti restaurant kalpasan a natiliw ti waiter na, ngem karaman latta daytoy a pinilaan da ti kaso.
Saan metten a dinakamat ni Sugayen no sadinno ti naggapwan dagiti nakumpiskar da a maipagarop nga illegal a droga.
