LAOAG CITY – Narekobre ti bangkay ti maysa a babai nga assistant store manager ti dakkel a mall iti ili a San Nicolas iti uneg a mismo ti apartment na iti Barangay 2 iti nasao nga ili.
Nabigbig ti biktima a ni Juvilyn Bardiaga,agtawen ti 26, ken taga Buenavista, Santiago City, Isabel.
Iti eksklusibo nga interview ti Bombo Radyo Laoag ken ni Police Major Paul Benedict Parado, ti chief of police iti ili ti San Nicolas, awan ti kawes ti biktima iti baba idinto a naipangato ti badona ken ti rupa na ket arigna nalulo gapu ti maipagarop a pannakatupak na ti nadagsen a banag.
Inbatad na nga adda pay ti nakita da a nakasurat iti tawa ti apartment ti biktima nga RIP a kayat na a sawen ket Rest In Peace.
Iti agdama, agtultuloy ti imbestigasyon dagiti otoridad tapno maamoan no ania ti nakatayan ti biktima ken motibo ti napasamak a krimen.
