LAOAG CITY – Rugianen ita a lawas ti mandatory certification dagiti imported ken locally manufactured vape products.
Ti baro a pagalagadan ket maipatungpal inton Hunio 5, maibasar iti rakurak ti Department of Trade and Industry.
Segun ken ni Trade Assistant Secretary Amanda Nograles, gagem ti nasao nga addang a siguradoen ti kinatalged dagiti vape products para kadagiti consumer ken a mabalin met a maipatungpal iti nalawlawa a consumer products kas dagiti electronic appliances.
Inbatadna a kayatda a siguradoen a saan a makaipauneg ti narisgo a kemikal dagiti vape users kas ti plastik iti heating process ti nasao a device.
Tingitingenda pay dagiti battery nga us-usarenda pakairamanan dagiti consumables.
Iti baet daytoy, inadmitir ni Nograles nga awan ti kapasidad ti Department of Trade and Industry nga ipadalan iti testing ti consumables ngem kunana nga agaw-awatda kadagiti analyses nga inpasada kadagiti certified laboratories.
