LAOAG CITY – Kinumpirmaran ni Commander Laurel Paul Mariano, station commander iti Philippine Coast Guard ditoy probinsya a naisalakan ti maysa a mangalap babaen ti maysa a foreign vessel nga MV UNICO Stella.
Nabigbig ti mangalap a ni Jimmy Garalde, residente iti Brgy. Ablan iti ili ti Burgos.
Segun kenni Mariano, maysa a korean registered vessel ti nangisalakan kenni Garalde iti baybay a sakop iti ili ti Pagudpud nga agtatapaw ken napattog ti nagluganan na a bangka.
Kuna na nga adda ti Pilipino iti nasao a barko nga isu ti nangtulong kenkuana ken nasayaat ti kondisyon ti mangalap.
Inbatad ni Mariano a nakasarita na ni Mr. Anthony Espinosa, ti Pilipino a nangtulong kenni Garalde nga idessaag da ti mangalap iti San Fernando City, La Union.
Inlawlawag na a naallon ti baybay iti port iti ili ti Currimao rason a nagdesisyon da nga iti La Union ti pagkikitaan da ita nga aldaw.
Inpasigurado ni Commander Mariano nga isuna mismo ti mangiyawid kenni Garalde iti pamilya na iti ili ti Burgos ngem kasapulan dagiti dukomento tapno makastrek iti Ilocos Norte kas panangsurot kadagiti protocol.
Innayon na a ti MV UNICO STELLA ket naggapu iti China ken agturong iti Indonesia.
Iti mainaig a damag, saan a namnamaen ni Mr. Anthony Espinosa, seaman ken Third Engineer iti MV Unico Stella, a naisalakan da ni Jimmy Garalde a residente iti Brgy. Ablan iti ili ti Burgos.
Kuna na a nagdesisyon ti kapitan ti barko a liklikan da ti dadakkel a dalluyon iti baybay rason a dimna da iti Ilocos Norte ket dita a naripar ti Koreano a shipmate na ni Garalde.
Segun kenni Espinosa, “blessing in disguise” ti pannakaisalakan da kenni Garalde kalpasan ti desisyon ti kapitan tapno liklikan dagiti dadakkel a dalluyon gapu ti bagyo.
Kalpasan a naisalakan da ti mangalap idi kalman malem ket dagus a nataming, inikkan da ti makan, naagasan iti sugat na ken nasayaat ti pannakataripato na.
Idi kinasarita ni Espinosa nga alas-tres ti parbangon idi kalman a napan nagkalap, ken idi agwiden ni Garalde iti agarup alas-sais ti bigat ket nasabet na ti napigsa nga angin ken dalluyon gapu ti tropical depression rason a napattog ti bangka na.
Ti pay palawag ti mangalap kenni Espinosa ket sumagmamano a barko ti dimmalyasat ngem saan da a nakita daytoy.
Innayon ni Espinosa a mapatta-patta a sumangpet da iti La Union iti agarup alas-nuebe ita a bigat.
Kabayatanna, nagyaman ni Debora Garalde, anak ni Jimmy Garalde kalpasan a naisalakan ti ama na iti tengnga ti taaw.
Inbatad na a nagmaymaysa ti ama na a napan kadagiti rama na iti baybay gapu ta nalinak ti baybay iti Burgos idi kalman ti parbangon.
Segun kenni Garalde, pinalabas da pay laeng iti sumagmamano nga oras iti namnamaen da a panagawid ti ama na ngem idi pimmigsa ti agin ken dalluyon pasado alas-dos ti malem ket dagus a nakikoordinar da iti ili ken iti coast guard.
Inbatad ni Garalde a nagkapkapet ti ama na iti napattog a bangka na.
