LAOAG CITY – Natay ti maysa a construction worker kalpasan a pinaltogan ti saan pay a nabigbig a suspek iti igid ti Padsan River iti Barangay 19, Sto. Tomas iti ili ti Sarrat.
Nabigbig daytoy a ni Magno Balicoco y Pascual, agtawen ti 55, construction worker ken mangalap, naasawaan ken residente iti nadakamat a barangay.
Segun kenni Police Major Hermy Ancheta, ti chief of police iti Philippine National Police iti ili ti Sarrat, nakaawat da ti tawag iti pasado alas-onse idi rabii manipud iti maysa a concern citizen no sadinno nakakita na ti biktima a nakadasay iti abay ti motorsiklo na nga addaan ti plate number 7776 FZ ken naduktalan da nga addaan daytoy ti tama ti paltog.
Kunana a ti biktima ti nagsagaba ti tama ti bala ti paltog iti ulo ken bukot na ken dagus a naitaray iti Dingras District Hospital ngem naideklara a dead on arrival.
Inbatad pay ni Ancheta a napa nagsilaw ti lames ti biktima ken rumrumuar nga agawid kuman idi maipagarop a tinambang ti saan pay a nabigbig a suspek.
Narekobre met iti nakapasamakan ti pammaltog ti dua a kapsula ti bala ti mapapati a kalibre 45 a paltog.
Mainaig iti daytoy, kuna ni Ancheta nga awan met ti madi a rekord ti biktima iti pulisya ken basar iti pamilya ket awan met ti nakariri na iti kallabes.
Immapela pay daytoy iti publiko kangrunaan na kadaiti posible nga adda ti ammo na iti daytoy a makintinnulong iti Philippine National Police.
Kabayatanna, inbatad ni Mrs. Leticia Balicoco, asawa ti biktima a bayat ti pannangan da idi rabii ket inawis pay laeng isuna ti asawa na a mapan agsilaw iti karayan.
Dinakamat na nga iti alas-onse ti rabii ket adda ti nagturong iti pagtaengan da a nangipakammo a ti biktima ket nadesgrasya ngem saan na a ninamnama a mapapatay daytoy.
Inpalgak na nga awan met ti nakariri ti biktima malaksid a napabasol ti asawa na a maipagarop nga agsangsangat kadagiti pakat iti karayan ngem saan met a pudno daytoy, addan ti lima a tawen ti napalabas.
Inlawlawag na nga adda pay idi ti inbaga ti asawa na a kanayon a kuskusilapan isuna ti agnagan ti “Edmund” kageddan ti panangipetteng ti biktima a saan na nga ugali ti agsangat iti naipakat nga screen iti karayan.
Kalikagom ita ni Mrs. Balicoco a maipaay ti hustisya ti pannakapapatay ti asawa na.
Iti agdama, agtultuloy met ti naun-uneg nga imbestigasyon ti Philippine National Police mainaig iti pammaltog tano mabigbig ken matiliw ti suspek ken madeterminar no anya ti motibo daytoy.
