LAOAG CITY – Naikkan ti citation ticket ti mangidadaulo iti Municipal disaster risk reduction management office (MDRRMO) ti gobierno local iti ili ti Vintar kalpasan ti panagparking na iti sango ti merkado publiko ditoy siudad ti Laoag.
Nabigbig ti nasao nga opisyal a ni Almon Leaño.
Segun ken ni Allan dela Cruz, ti traffic enforcer, nabayag a nagtalinaed iti sango ti merkado publiko ti lugan ni Leaño.
Inbatad na a bayat ti panangipan ti traffic enforcer ti ticket iti windshield ti lugan ket dimteng ni Leaño ken sinita na daytoy mainaig iti ticket.
Inlawlawag ni dela Cruz nga inikkan na ti ticket gapu ti panaglabsing na ti no parking ngem saan nga aklunen ni Leaño gapo ta segun kenkuana ket inpakada na ti panangisardeng na ti lugan iti maysa a traffic aide.
Innayun ni dela Cruz nga inpetteng pay ni Leano a saan a rumbeng a mamulta daytoy gapo ta lugan ti gobierno ti inusar na.
Nupay kasta, inikkan latta ni dela Cruz ni Leano ti citation ticket.
