LAOAG CITY – Naglikudan ni Mr. Ruben Patricio, mangidadaulo ti Civil Security Unit ditoy siudad ti Laoag ti alegasion kontra kenkuana a maipagarup a mapan laeng ag-time in iti attendance ken dagus daytoy a rummuar wenno tumalaw.
Segun kenkuana, rummuar daytoy gapu ta mapan agmonitor kadagiti nagduduma a lokasion a nakaidestinoan dagiti Civil Security Unit personnel.
Inbatadna nga apaman a malpasna a makita dagiti adda iti babaenna ket insigida met laeng daytoy nga agsubli iti pangopisinaanda.
Inlawlawagna no bilang adda ti rantana a rummuar ket agpakada daytoy kadagiti kakaduana tapno maibilin met laeng kadakuada ti nasken nga aramidenda kabayatan ti kaawanna iti opisinada.
Immuna iti daytoy, adda ti naawat ditoy Bombo Radyo Laoag a reklamo kontra ken ni Patricio a maipagarup a masansan a rumrummuar daytoy nangruna no adda dagiti bisita nga agturong iti lokal a gobierno ditoy siudad ti Laoag.
