LAOAG CITY – Pinatawagan ni Dr. Melvin Manuel, ti mangidadaulo iti City Disaster Risk Reduction and Management Office ditoy siudad ti Laoag dagiti amin a mangngalap a napan iti baybay sakbay pay a naiparuk-at ti tsunami warning.
Segun kenkuana, daytoy ket babaen ti pannakikoordinarda kadagiti maseknan a kapitan ditoy siudad ti Laoag tapno saan a maisagmak iti peggad ti biag dagiti mangngalap.
Inbatadna nga adda met dagiti naisayangkat a drill iti Brgy. Gabu ken Brgy. Caaoacan ditoy siudad maipapan iti kastoy a pasamak.
Kunana nga adda met dagiti naiestablisar a warning signages nga isu ti pakalasinan ken mangipasimudaag ti pakdaar kadagiti umili.
Inlawlawagna a nakasagana dagiti amin nga equipment a mausar no bilang sumangbay ti didigra pakairamanan dagiti kameng ti Philippine National Police, Philippine Coast Guard ken dadduma pay.
Innayonna ti panagridam dagiti amin a residente ditoy siudad ti Laoag kangrunaanna kadagiti agnanaed iti coastal areas.
Maipalagip a nangiparuk-at ti Philippine Institute of Volcanology and Seismology ti tsunami warning gapu iti idadayyeg ti 7.5 magnitude a ginggined idiay Taiwan ngem inkanselar met laeng ti nasao nga ahensia ti nadakamat a pakdaar iti intero a pagilian.
