LAOAG CITY – Mamati ti mangidadaulo ti Philippine Health Insurance Corp. (PhilHealth) a dakkel ti epektona ti masansan a panagsukat ti mangimatmaton iti korporasionda iti panangpaalisto ti panangipaay ti napinpintas a benepisio kadagiti miembroda.
Inbatad ni PhilHealth President ken Chief Executive Officer Emmanuel Ledesma Jr., no kastoy ti agbalin a scenario ket bumayag ti pannakaipaay ti nangato a benefit package.
Inlawlawag ni Ledesma a sipod idi administrasion Aquino agingga iti administrasion Duterte ket dumanonen iti 11 a personalidad ti nangidaulo iti korporasionda.
Kunana a saan nga umdas dagiti empleadoda pakairamanan ti legal, HR, finance ken ti actuary department.
Iti agdama, agtultuloy ti maisaysayangkat a panagadal ti Governance Commission for Government-owned and Controlled Corporation maipanggep iti panangnayon kadagiti empleadoda.
