LAOAG CITY – Inlawlawag ni Mrs. Helen Rose Domingo, mangidadaulo ti Provincial Sports and Development Office no apay a temporario a napaserraan ti Ferdinand Edralin Marcos Stadium.
Segun kenkuana, manarimaan ti panangisayangkatda ti preventive maintenance tapno agbalin a kualipikado ti Marcos Stadium para iti international standards.
Inbatadna nga adda dagiti sumagmamano a paset ti Marcos Stadium a saan nga agpapada ti kangatona isu a masapol a maiyurnos daytoy tapno masurot ti adda iti World Athletics Manual ken makaalada ti sertipikasion manipud iti World Athletics.
Babaen iti daytoy, inpasingkedna a saan laeng para iti local ken national no di ket karaman payen dagiti maisayangkat nga international events iti nasao nga stadium.
Inpalgakna a naitantan ti pannakaipatungpal daytoy gapu kadagiti nagsasaruno a bagyo ngem agpaot laeng iti dua a lawas daytoy.
Naammoan nga agsubli ti pannakalukat ti Marcos Stadium iti maikadua a lawas ti Disiembre.
Immuna iti daytoy, kuna ti mangidadaulo ti Provincial Sports and Development Office nga adu latta ti sumsumrek iti Marcos Stadium sakbay pay a napaserraan daytoy.
Maipalagip nga inrakurak ni Mayor Michael Marcos Keon nga arig a nagbalinen a “Ghost Town” ti Marcos Stadium sipod idi nangrugi ti pannakaipatungpal ti panagsingir ti entrance fee kadagiti sumrek iti nasao nga stadium.
