LAOAG CITY – Inlawlawag ni Atty. Nikki Pilar, mangidadulo iti Metro Ilocos Norte Council (MINC) ti gagem ti panaka-establisar ti Central Terminal Hub ditoy ciudad ti Laoag.
Segun ken ni Atty. Pilar, daytoy ti agbalin a solusyon iti trapiko ken panakapapintas iti public transportation ditoy probinsya.
Kunana a no malpas ti nasao a proyekto ket daytoy ti agbalin terminal ken pagparkingan dagiti amin a jeep, taxi provincial bus kas iti Laoag-Badoc ken Laoag-Pagudpud pakairamanen dagiti tricycle ditoy ciudad.
Innayonna a daytoy pay ti agbalin pick-up and drop-off point dagiti pampubliko a lugan.
Inlawlawag na pay a no maipapan iti renta a bayadan dagiti transport groups, kunana nga awan pay iti napagtutulagan maipanggep iti daytoy ngem nu addanto man ket nabababa ngem iti agdama a baybayadanda a 7,000 pesos agingga iti 12,000 pesos iti kada bulan
Kabayatanna, inpakaammo ni Atty. Pillar a kageddan ti panaka-ipatakder ti Central Terminal ket iti panakaadal dagiti mabalin a tuma-od a problema tapno masigurado a napintas ken balligi iti panakausar ti nasao a proyekto.
