LAOAG CITY – Kinumpirmaran ni SFO4 Dominador Ignacio, municipal firemarshal iti Bureau of Fire Protection iti ili ti Burgos, a natayen ti biktima ti desgrasya kalpasan a nakadungpar ti aso iti Brgy. Ablan iti nasao nga ili.
Daytoy ket kabayatan ti pannakataming ti biktima iti Mariano Marcos Memorial Hospital and Medical Center iti siudad ti Batac.
Naamuan ni Ignacio ti nasao nga impormasyon manipud kadagiti kameng ti Philippine National Police.
Mainaig iti daytoy, inlawlawag ni Igancio nga idi nagresponde da iti pannakadesgrasya ti biktima ket nagsagaba iti sugat iti saka, ima idinto a nakana a sugat iti ulo na.
Kuna na a possible pay a natukkol ti tenged ti biktima, kas naibasar kadagiti kadua na a nagresponde.
Ti biktima ket maysa a mangisursuro, agtawen ti 26, ken residente iti Brgy. 18 iti ili ti Bacarra.
Inbunannag ni Ignacio a possible a mapan iti pagadalan iti ili ti Bangui ti nasao a biktima.
Kabayatanna, nagpanawagan ni Ignacio iti publiko a masapul a maigalut dagiti taraken nga aso agraman kadagiti dadduma a dingwen a nakawarwar iti igid ti kalsada.
Iti panagusar ti helmet, insuhestiyon na iti panagusar kuma iti full face helmet bayat ti panagi manihir ti motorsiklo nangruna no adayo iti pagturungan.
